我們的幸福印記

2015年7月23日星期四

BOO爸BOO媽上學去

由於BOO爸BOO媽對於懷孕及照顧BB的知識真係乏善足陳, 所以我都好留意有無產前講座可以上, 惡補一下. 不過原來市面上免費既產前講座真係好受歡迎架, 一般報左名都要睇下抽唔抽中先有得上, 有幾個講座報左名都抽唔中.

免費既未有得上, 就惟有上D要交學費架啦. 仁安醫院有一個以6堂為單位既講座, 每堂1.5小時, $1,100可以供2位參加, 每次上堂前仲有REFRESHMENT, 可以連晚飯都慳返. 7月23日係第一堂, 跟住連續6個星期四晚上都會黎仁安上堂喇.

其實我真心覺得個講座係貴架, 點知上堂都好多同學仔, 宜家D準爸媽為左BB真係好捨得呀!

2015年7月22日星期三

NEW LOOK FOR BABY BOO

一早其實都打算修剪下把頭髮, 因為實在太長, 髮質又太差. 不過知道有左BABY BOO後, 就決定剪短D, 方便打理. 今日趁OFFICE唔係太忙, 攞左半日假去阿BEN度, 佢以為我好似平時咁電髮. 點知我同佢講淨係剪, 唔電得呀, 佢就好醒目咁問我係唔係有左! :>

佢知道都好開心, 其實次次去阿BEN度, 佢都叫我快D考慮下生BB, 今次見到佢, 估唔到真係報喜喇!

自從大學YEAR2暑假之後, 就無試過頭髮短過肩. BY THE WAY, 呢張相無美圖修修架!

2015年7月20日星期一

有媽的孩子像個寶

自從話左俾媽媽知我有左後, 媽媽每個WEEKEND都會煲定靚湯俾我飲, 花膠呀, 海參呀, 鮑魚之類. 媽媽既湯水用料靚, 又好飲. 幾時都話"有媽的孩子像個寶"! 我好幸福呀!

2015年7月18日星期六

大肚照 (12WEEK)

終於都到WEEK12喇！不過如果計日數，都係未夠3個月，所以有好多懷孕參考書都將WEEK13甚至WEEK14先為之踏入懷孕中期。不過呢個禮拜，個肚真係大左呀，正面睇都覺呢！

2015年7月14日星期二

娃娃

今日放左工去左荃灣搵老公食晚飯, 之後係愉景新城發現左間荷花, 忍唔住要入去行下.

呢個BB公仔真係好似呀!

母性大發, 抱上手玩下先! 一睇就知我唔識抱B. HAHA!

2015年7月11日星期六

愈唔食得愈想食

自從踏入大約第8第9周，雖然無咩嘔，不過個胃就係咁頂住頂住，真係咩胃口都無晒。成日想食既就係Ｄ唔健康既野食，例如煎炸野呀，辣野呀，甜品呀，呢Ｄ就想食囉。仲唔知攞景定贈慶，今年開左好多特色雪糕店，出左好多新既雪糕口味，真係好想食。不過我暫時都忍到口，係有時痴下老公食幾啖出前一丁。

不過有幾次食飯既時候見到老公飲可樂，真係好想飲呀！見到Ｄ氣＂炸炸＂聲咁，好魔鬼囉！於是我就決心要買定一罐無咖啡因可樂係屋企看門口，以免有一日真係忍唔住！我仲有諗過如果唔飲得凍既，咁煲薑可樂囉！

　　　　　　　　　　老公發現我罐可樂即刻笑我！我都估唔到一買就俾佢發現！