媽媽給BABY BOO的第一封信

親愛的BABY BOO,

自從知道有左你之後, 媽媽雖然身體上要適應你既存在, 經常都會有一D唔舒服既感覺, 但係爸爸同媽媽真係好開心呀. 你既出現, 真係令我地又驚又喜. 由於爸爸媽媽一直都好擔心自己唔適合做家長, 所以即使結婚接近8年, 我地都未有生BB.  不過基於媽媽的年齡限制, 如果今年唔生BB, 我諗我地真係唔會要小朋友喇. 所以你既出現, 確實係上天賜予爸爸媽媽其中一份最大的禮物.

之前媽媽都有D擔心你爸爸, 唔知佢會唔會適應唔到呢, 不過當你爸爸知道有左你後, 佢好開心呀,  仲好緊張照顧媽咪, 因為我地真係好想好想你未來既9個多月, 可以健健康康咁係媽咪個肚入面成長.

尋日係爸爸媽咪第一次係醫生度照超聲波見到你, 你雖然好細少, 只有0.99mm, 即係連1cm都無, 但係你真係好聽話, 醫生一照就照到你, 仲見到你個心閃下閃下既跳動. 個一刻, 媽媽真係好感動呀, 真係有想喊出黎既衝動. 黎緊你要keep住乖乖, 痴實媽咪, 健健康康咁係媽咪度吸收營養.

有左你之後, 爸爸媽媽經常會諗你第時出世叫咩名好呢? 男仔名諗下, 女仔名又諗下. 不過由於未知你係男仔定女仔, 媽媽好想為你諗一個nick name用住先.  係超聲波見到你後, 我即刻忍唔住同你爸爸講, 想叫你做baby boo. 因為媽咪好鐘意怪獸公司呢套卡通阿boo呢個角色. 雖然阿boo係女仔, 但係我覺得無論你係男仔定女仔, 都會好似阿boo咁可愛, 咁得人鐘意.

Baby Boo, 爸爸媽媽會用心與你經歷這奇妙既9個月, 熱烈期待9個月後帶你來到這繽紛既世界.

愛你的Boo媽媽上
2015年6月

第一次私家產檢@仁安醫院

好緊張呀! 終於等到第一次產檢既日子, 即係假如一切順利, 今日可以照超聲波, 第一次同BB見面. 由於之前係BABY KINGDOM見到好多化學性懷孕, 空心胎同埋宮外孕既例子, 所以由驗到有左一刻開始, 除左開心之外, 就是忐忑, 所以我不時都會摸下自己個肚腩, 同BB講, 叫佢要乖乖地痴實媽咪, 要健健康康係媽咪個肚入面長大, 到今日照超聲波, 要俾爸爸同媽咪見到架.

約左吳祟傑醫生下午3點, 我請了下午半日假(由於未夠3個月, 都未話俾老闆知, 唯有用自己假期去產檢啦). 老公係TST接我之後, 我地先到沙田食LUNCH, 之後就揸車上仁安.  可能太緊張, 一去到我就話要去廁所, 點知姑娘同我登記完, 就叫我留小便CHECK蛋白尿. 今次真係豬豬!!!!姑娘話一定要留左小便先可以見醫生.......好彩等候區有部水機, 於是我就係咁灌水, 希望快D有小便. 好彩過左10分鐘到都去到. 但係真係覺得自己太百痴喇!

一驗完小便, 結果正常, 填埋問卷同度高量體重, 姑娘就叫我入房見醫生喇.

入到房見到吳醫生, 佢頭髮有點花白, 個樣COOL COOL地啦, 不過都好溫文既.  首先係照超聲波, 我訓係張好似睇牙醫既床上面, 姑娘好細心咁照顧我, 幫我落GEL. 跟住醫生就入黎喇. 其實呢個時候我好緊張架, 究竟見唔見到BB既閃閃呢? 吳醫生一放個超聲波落我個肚臍下方位置, 我就即刻係個MON度見到一粒豆豆既物體係度閃下閃下, 吳醫生就同我地講呢個就係BB喇. 長度大約係0.99mm, 比用上一次經期計少一周. 吳醫生話這可能是因為遲排卵的原因, 所以佢推算我今日為7周. 不過吳醫生話BB今日既位置唔算照得好清楚, 佢建議我兩個星期後再返黎檢查, 屆時佢再幫我計準D.

原來見到BB那一刻真係好感動架, 亦都好感恩, 原來一切一切都唔係必然架. BB你好乖乖好叻叻呀, 你真係有聽媽咪既說話, 俾我地見到你閃閃. 我好期待兩個星期後再同你見面呀. 你要繼續係媽媽個肚入面吸收營養, 希望下次見到你既時間你會大個左, 更加有活力. 


                       BB第一次既超聲波相片. 一個生命的誕生真係好神奇.......

營養補充品

由計劃懷孕開始, 我就開始服用以下營養補充品, 希望可以調理一下身體, 最重要係希望BB可以健健康康.

                                     一定唔少得既葉酸

 

 

                                   好味既田原香滴雞精. 田原香係台灣品牌, 不過係香港有門市. 呢個品牌有不同的配方, 適合唔同需要既人士飲用. 我懷孕前就飲"緊蜜"同"想孕"系列, 前者係促進排卵及改善卵子質素; 後者就提高身體的黃體素, 有助受精卵著床.  每次飲用前只需放入微波爐叮大約40秒便可, 十分方便. 非常適合平時無咩湯水飲既人士. 所以我有左之後都有繼續飲滴雞精, 仲可以隨著不同既孕期, 揀選合適的配方飲用.

大肚照 (唔知幾多WEEK)

由於知道自己遲排卵, 所以純粹用上次經期去計週數應該唔準, 又未照超聲波, 所以都唔知自己宜家屬於幾多周. 不過幾多周都好啦, 我都決定左由今個星期開始, 每星期影低肚腩仔既變化, 日後睇返應該會幾得意.

好似都有D肚腩仔, 不過應該純粹係呢排無得做GYM既後遺症, 同有左BB無關! 一影相, 吉吉B就要扭抱, 做左攝石吉吉!

 

老公幫我影完先發覺自己今朝勁水腫, 好樣衰囉.....

攰攰攰

係呢一個禮拜, 應該係大約5-6WEEKS, 其實我都唔算有好多好明顯的害喜徵兆, 起碼都無嘔, 只係有D胃氣. 不過個人就真係好攰, 放假訓到10點, 食過早餐或且午飯, 又會覺得眼訓, 總知就淨係想係張床度. 有時就算訓唔著, 成個人都好似無咩力氣咁.  老公知道我有左之後, 其實已經差唔多做晒所有家務, 我淨係煮飯就得. 所以除左返工, 我都唔敢周圍去, 一放工就返屋企, 就連插花班都停左, 等自己有多D時間休息, 希望BB健健康康成長.

仁安吳祟傑醫生

政府排左期, 跟住就要搵私家醫生做產檢. 由於一心打算係仁安生, 所以都係以仁安既醫生為目標. 因為未夠3個月, 我連屋企人都未通知, 就更加唔敢問生過BB既朋友仔佢地用邊個婦產科醫生, 咁唯有上網睇COMMENTS啦. 其實普遍媽媽對仁安既醫生的COMMENTS都唔差, 而我自己又PREFER男醫生, 所以最後就揀左吳祟傑醫生. 吳醫生除左係仁安有得睇, 都可以係翹康醫務所睇佢, 價錢仲好似平D. 於是打去翹康BOOK, 點知吳醫生真係好FULL, 最快要到6月尾先有得睇. 基於好想係8周或之前照到超聲波, 於是再打去仁安, 終於可以安排到6月10日睇吳醫生.

好野, 又完成多一個TASK! BB, 我地6月10日見喇! 你乖乖地痴實媽咪, 6月10日要見到你心跳閃閃架!

威院排期

今日係爸爸的舊曆死忌一周年, 一早其實已經攞左下午半日假, 諗住去探下媽咪, 同埋拜祭爸爸. 尋日攞左醫生證明, 所以順道利用呢半天假去威院預約排期. 錫到我燶既老公當然有陪我去啦!

其實好多公務員生BB都喜歡揀QE, 因為口碑好, 加上有公務員隊, 唔使同街外人迫. 除左地點的考慮外, 由於姐夫係威院做, 媽咪又多舊同事係威院, TOUCH WOOD有事都好似容易D照應, 於是一有左BB都打算政府會排威院. 不過政府醫院其實都係作保險, 因為同老公商量過, 我地都係PREFER係仁安開刀, 雖然我係公立醫院生唔使錢, 不過始終對政府醫院無咩好感. 經濟能力容許下, 我都會揀私家.

下午約2點半去到威院, 可能無左雙非, 排隊既人唔算多, 約10數人啦. 去到COUNTER姑娘話要填FORM, 之後就坐係度等. 係坐係到等既過程, 我一路想起爸爸, 可能因為今日係爸爸忌日, 而爸爸亦進出過威院多次, 令我真係好掛住佢. 如果爸爸知道我有左BB, 我諗佢都會好開心的.

一等就等左個半鐘, 跟住姑娘就叫左大約6至7個人名, 原來我地呢幾個媽媽都係第一次黎排期, 姑娘因應我地既預產期分配左唔同既產檢同OSCAR日期俾我地, 跟住就走得.

好喇, 排左政府期, 又完成一個TASK!