仁安吳祟傑醫生

政府排左期, 跟住就要搵私家醫生做產檢. 由於一心打算係仁安生, 所以都係以仁安既醫生為目標. 因為未夠3個月, 我連屋企人都未通知, 就更加唔敢問生過BB既朋友仔佢地用邊個婦產科醫生, 咁唯有上網睇COMMENTS啦. 其實普遍媽媽對仁安既醫生的COMMENTS都唔差, 而我自己又PREFER男醫生, 所以最後就揀左吳祟傑醫生. 吳醫生除左係仁安有得睇, 都可以係翹康醫務所睇佢, 價錢仲好似平D. 於是打去翹康BOOK, 點知吳醫生真係好FULL, 最快要到6月尾先有得睇. 基於好想係8周或之前照到超聲波, 於是再打去仁安, 終於可以安排到6月10日睇吳醫生.

好野, 又完成多一個TASK! BB, 我地6月10日見喇! 你乖乖地痴實媽咪, 6月10日要見到你心跳閃閃架!

威院排期

今日係爸爸的舊曆死忌一周年, 一早其實已經攞左下午半日假, 諗住去探下媽咪, 同埋拜祭爸爸. 尋日攞左醫生證明, 所以順道利用呢半天假去威院預約排期. 錫到我燶既老公當然有陪我去啦!

其實好多公務員生BB都喜歡揀QE, 因為口碑好, 加上有公務員隊, 唔使同街外人迫. 除左地點的考慮外, 由於姐夫係威院做, 媽咪又多舊同事係威院, TOUCH WOOD有事都好似容易D照應, 於是一有左BB都打算政府會排威院. 不過政府醫院其實都係作保險, 因為同老公商量過, 我地都係PREFER係仁安開刀, 雖然我係公立醫院生唔使錢, 不過始終對政府醫院無咩好感. 經濟能力容許下, 我都會揀私家.

下午約2點半去到威院, 可能無左雙非, 排隊既人唔算多, 約10數人啦. 去到COUNTER姑娘話要填FORM, 之後就坐係度等. 係坐係到等既過程, 我一路想起爸爸, 可能因為今日係爸爸忌日, 而爸爸亦進出過威院多次, 令我真係好掛住佢. 如果爸爸知道我有左BB, 我諗佢都會好開心的.

一等就等左個半鐘, 跟住姑娘就叫左大約6至7個人名, 原來我地呢幾個媽媽都係第一次黎排期, 姑娘因應我地既預產期分配左唔同既產檢同OSCAR日期俾我地, 跟住就走得.

好喇, 排左政府期, 又完成一個TASK!

BINGO!

係心情既緊張又忐忑的狀態下, 一個星期終於過去了, 今日會再去診所驗尿, 希望HGC指數有上升, 兩條線夠深, 醫生肯出證明俾我啦. 其實我真係好驚呀, 星期日自己偷偷地去萬寧買左支同診所同一個牌子既棒棒, 係屋企驗. 好彩都好快有兩條深色線, 希望可以順利過關啦.

9點15分去到診所, 點知姑娘話醫生塞車要遲D返, 我真係好後悔睇呢個醫生囉. 咁唯有去食個早餐先啦. 最後等到差唔多10點半, 醫生終於返到, 仲好快叫左我入去. 佢今次終於都肯寫證明俾我, 不過就無好似人地D醫生咁話恭喜我, 淨係問我要唔要佢寫REFERRAL LETTER. 傻架咩, 唔使寫做咩要睇你喎! 另一搞笑地方係人地D證明信會講預產期幾時, 佢又唔寫, 淨係話我係EARLY PRENANGCY. 唔知係未先入為主, 我真係覺得呢個醫生唔得囉!  另外, 佢咁又收我左我$200!!!


意義深長的兩條線

睇中醫

由於好擔心, 我就同老公商量, 不如去大圍搵潘東(呢個中醫我細個成日睇, 後來佢出左名, 成為不育同安胎聖手)睇下, 安下胎. 於是趁星期六一早, 老公就車我去大圍睇醫生.

可能落大雨, 人唔係太多, 等10個到, 不過一路等都幾緊張. 入到去見醫師, 佢仲問我係唔係想要BB. 我同醫師講係有左, 想安胎. 於是佢同我計返對上一次M COME, 話應該係4WEEKS左右. 於是佢開左6包安胎藥俾我, 同俾左張戒口紙我, 提醒我要小心飲食. 仲建議我地遲D照到閃閃後, 要買佢樽冬蟲夏草粉, 好好養胎.

原來唔食得义燒, 前一晚同老公食飯, 仲食左勁多呀.......

醫生證明

5月19日驗到有左後, 嗱嗱淋上BABY KINGDOM爬文, 睇下跟住落黎要做D咩. 首先要去私家診所做多次驗孕, 再由醫生出封懷孕證明, 攞住懷孕證明, 先可以去公立醫院登記.

我都係心急既人, 諗住唔好拖, 就預先同老闆講話20號上午有MEDICAL APPOINTMENT, 諗住係錦繡睇完醫生, 再去威爾斯排期. 點解係威爾斯就遲D再補充.

20號9點老公陪我去診所, 點知醫生未返, 唯有去大家樂食個早餐先啦. 食完早餐, 診所姑娘就叫我去留小便. 跟住好快, 就入去見醫生. 醫生張枱上面有枝棒棒, 我仲見到有兩條線TIM, 點知個醫生話佢認為條線唔夠深色, 唔可以出證明俾我, 叫我下星期先再去驗過. 我個刻真係好失望, 睇左好多網上既POSTS, 都好似無咩人有我呢個情況, 人人都好似好順利就攞到證明, 真係搞到我好擔心, 仲要個醫生咁都收我$200, 真係好激氣.

無得去排期, 咁就唯有返工啦. 跟住接著就繼續係網上爬文, 見人地話HGC指數唔高, 有機會係宮外孕或且空心胎, 真係愈睇愈驚, 但係又唔敢同老公講, 怕佢擔心. 哎, 我終於發覺原來媽媽真係好偉大, 一D都唔易做. 十月懷胎咁多野擔心, 又有咩可能唔錫自己個BB呀.  希望BB乖乖地痴實, 再過一個禮拜可以順利過關啦! BB你要叻叻呀!

女皇駕到

之前講到老公未訓醒, 唔係好有反應. 點知當我返到公司無耐, 就收到佢既LINE MESSAGES, 提我有咩唔食得, 又會有咩反應. 佢仲一早返左公司, 去BABY KINGDOM做RESEARCH呢. 我都知老公錫我架喇! (晒命中)

呢晚之前買左飛去演藝睇SOUND OF MUSIC, 老公未夠6點就去到我公司樓下等我, 接我去食野. 沿途到散場佢都超級緊張我, 我正式宣布: 我既大肚婆皇后生活正式展開!!!!

係真唔係呀?

進入2015年5月, 即係第三個CYCLE後既PERIOD DUE DATE, 心情都幾忐忑, 自己都有諗如果生唔到羊BB, 咁我仲會唔會繼續試, 咁如果會, 又應該試到幾時呢?

由於CHECK到呢個CYCLE遲左大約一個星期排卵, 所以都有心理準備PERIOD會遲一個星期, 所以原本既DUE DATE係15號, 過左無M我都無諗住CHECK. 到左5月19日, 呢朝要開會, 要晨咁早起身返工, 但係又唔知點解返工前走去攞枝貴價CLEAR BLUE黎檢. 由於無抱期望, 檢左放低一邊, 繼續刷牙洗面. 洗完面睇下枝棒棒, 嘩! 不得了, 未戴CON, 係未睇錯呀? 2-3 WEEKS?!!!!用手攞近D, 發現自己手都震埋, 真係以為自己發緊夢.


貴價既CLEAR BLUE除左可以係PERIOD DUE DATE前4日檢到有無懷孕, 仲有周數顯示, 唔似其他CHEAP CHEAP棒棒, 比D深淺色線玩到謝.

定一定神, 即刻走去叫醒仲訓緊覺既老公, 俾枝棒棒佢睇. 佢可能真係未訓醒, 佢應左我"吓? 真係有左呀?" 之後, 就叫我返工要小心D. 跟住就好似無咩反應喇.

不過坦白講, 我自己個刻都有D不知所措, 於是我又好本能咁換衫返工.  宜家諗番, 都覺得幾搞笑.

做人準備中

終於決定試下要BB, 於是同老公去家計會做孕前檢查. 感恩樣樣指標都OK. 最神奇係我一直都以為自己係乙肝帶菌者, 點知原來只係老公有, 但係唔知點解一直我都無受感染, 於是醫生就建議我打番乙肝疫苗後先懷孕. 咁樣一搞, 即係大約9個月後先可以懷孕.

一打完最後一針, 就即刻展開造人大計, 即係大概2015年2月份. 為左提高命中率, 我認真到去買左排卵棒學人地計排卵期. 點知第一個CYCLE過左, 唔中, 到第二個CYCLE都唔得, 我個心都諗人老左, 生BB真係唔容易, 係BABY KINGDOM又見好多人去做人工受孕, 都知道唔係你話要有就有.  我仲係咁同老公講, 話我自己已經係"不育寶寶". 不過老公真係好好架, 佢仲話如果無BB, 我地兩個加埋狗狗其實都會一直過得好開心, 一齊順其自然就好.

話雖如此, 我自己諗住如果有BB, 我好想佢係羊BB, 因為我自己屬羊, 同屬馬既老公真係好夾架, 我都想BB好同老公好夾.  不過如果要羊BB, 我就要最遲係4月BINGO, 所以第三個CYCLE已經係羊BB既LAST CHANCE.  我個心真係有D急架, 仲打訂輸數喇.

To be or Not to be

未同老公結婚之前, 一心都諗住過一兩年二人世界就會生BB. 不過可能二人世界太開心, 加埋兩隻超得人鍾意既吉吉同MILK MILK, 真係令我無咩生BB既衝動. 而最重要可能係我覺得現今做家長同孩子都要承受太多壓力, 我又唔想做怪獸家長, 所以我同老公既造人計劃幾乎已被擱置下去了.
                                                呢兩隻豬仔真係得意到呢!愛死你地呀

 

但係畢竟現實係殘酷既, 面對自己已踏入高齡產婦既行列, 我都不得不再問問老公我地係未真係唔生, 唔生第時無得後悔架. 當我地個心都仲係十五十六之際, 我至親至敬愛既爸爸卻因通波仔手術洐生的後遺症而離開左我地. 呢個時候, 我發現原來我好後悔無係爸爸在生既時候生BB, 讓我既孩子可以享受慈祥既外公既寵愛. 我唔想再有呢D遺憾, 於是我同老公都決定試下生BB.

畢竟我都高齡, 我地都抱著平常心, 即管試下有無得生啦!

好耐無寫BLOG喇

上一次寫BLOG應該係籌備結婚同埋剛剛接吉吉BB返屋企既時候, 無10年, 都有9年喇!  以我份人其實都無咩恆心, 不過既然人生即將展開新既CHAPTER, 又慶起寫番個BLOG, 留念一下. 究竟人生新既CHAPTER係咩? 暫時唔講, 賣下關子先. HEE HEE.